Sons de Nós con Lumedoloop 19 de decembro de 2025

Porque os nosos convidados de hoxe, LUMEDOLOOP, aseguran que o segredo deste novo proxecto reside non na súa novidade, senón nas décadas de experiencia compartida en centos de escenarios. Experiencia e complicidade creativa a que une a Jamas e Møu, membros fundadores de Dios Ke Te Crew, e figuras clave do hip hop galego, xunto a DJ Mil, un dos pica discos máis recoñecidos da escena urbana galega. Compartimos conversa nesta edición de Sons de Nós con Jamas, Julio Negueruela, voz de Lumedoloop. Eles mesmos definen a súa proposta como a fusión entre o lume da creatividade e o loop infinito da evolución artística. Non se trata só de facer rap: trátase de expandir o xénero, de xogar con estilos, de reinventar sen esquecer a raíz. A lingua galega sempre presente, entendéndoa ademais como un elemento a reivindicar e empoderar, como amosa “Non traio un laio” o terceiro adianto do seu xa moi próximo primeiro traballo discográfico (Re) existencia. E humor e retranca, moita retranca, porque como di Jamas, “A retranca é un superpoder que temos as galegas e galegos e deberíamos aproveitalo máis”. Xa nos foron presentando adiantos do que vai representar este ambicioso e comprometido traballo que será (Re)existencia; en outubro coñecimos «Rico de Sabor» que afirman é o seu manifesto sobre o materialismo afectivo fronte á aritmética fría do capital. En novembro chegou «Rap Cru», nesta ocasión reflexionando sobre a necesidade de defender a autenticidade na creación artística sen aditivos comerciais. E hoxe chega «Non Traio Un Laio», o manifesto máis combativo da banda ata a data. Funcionando como psicanálise colectiva e declaración de principios, a canción ergue a voz contra a submisión lingüística, o desarraigo cultural e a favor do empoderamento da lingua galega. Lumedoloop o teñen claro, a súa proposta musical, toda unha filosofía de vida, reflíctese neste “(Re)existencia” que presentarán o 20 febreiro. O título xoga co verbo existir —do latín ex-sistere, “saír para situarse no mundo”— e co prefixo (Re-), que funciona como un interruptor conceptual, activando tres dimensións interconectadas que forman o núcleo ideolóxico e emocional do álbum. En primeiro lugar, a Rexistencia representa o lume da firmeza innegociable: a loita creativa e integral “a chispa teimuda que non se deixa apagar”. En segundo termo, a Reexistencia simboliza o loop da transformación perpetua. Finalmente, a Existencia emerxe como a presenza plena e consciente no mundo: o estado alcanzado tras resistir e transformarse. É vivir con dignidade radical, coherencia interna profunda e unha relación honesta coa verdade propia. Non é un destino ao que se chega un día concreto, senón un modo de camiñar: co peito aberto, a cabeza ergueita e sen pedir permiso para ocupar espazo. Xuntos, estes tres eixos conforman o marco conceptual dun traballo que aspira a ser máis que música: unha invitación a reflexionar sobre o significado de vivir con conciencia e sobre a creación artística como ferramenta de resistencia, pensamento crítico e celebración colectiva. Lumedoloop presenta “(Re)existencia» como unha obra conceptual que vai máis alá dun conxunto de cancións: é a materialización dunha filosofía de vida e un mapa de navegación para tempos convulsos. Hip-hop comprometid