Sons de Nós con Carlos Lijó

Nesta nova entrega de Sons de Nós imos falar dun deses proxectos que nos gustan especialmente… deses que mesturan tradición e futuro sen perder a esencia. Xa sei que igual é caer un pouco no tópico dicir que Galicia é o seu son: a gaita, o pito, a requinta…, instrumentos que forman parte da nosa identidade e da nosa memoria colectiva. Sons que pasaron de xeración en xeración e que, seguro que non ides sorprendervos, agora tamén atopan un novo camiño no mundo dixital. Porque o dixital está aquí e veu para quedarse. Hoxe imos coñecer unha proposta que vai xusto nesa liña: achegar a música tradicional galega a novos espazos, novas persoas e novas formas de crear. Conversaremos con Carlos Lijó, creador de “Breogán VSTi”, unha ferramenta que permite tocar a gaita… desde un ordenador. Carlos iniciou a súa proposta para crear ferramentas musicais con “Carmucha” un plugin no que recreaba percusións galegas, pandeiretas, pandeiro e tamboril, agora, nun chanzo evolutivo máis que lóxico, ven de presentar “Breogán VSTi”, unha ferramenta que demostra que a tradición non é algo do pasado, senón unha base sobre a que seguir creando. Un proxecto que leva o son da gaita e doutros instrumentos tradicionais galegos ao mundo dixital, facéndoos accesibles, abertos e preparados para formar parte da música do presente e do futuro. Desde calquera ordenador, en calquera parte do mundo, agora tamén se pode soar a Galicia.