Sons de Nós con Catuxa Salom 10 de xaneiro de 2024

As súas raíces familiares na Arxentina impregnan a súa creación musical e Latinoamérica está presente no que fai. Pero son moitas as súas influencias, dende o blues, o funky, Mercedes Sosa, Violeta Parra, Fuel Fandango ou Baiuca. Tras unha etapa en Madrid, onde estudou e iniciou a súa carreira artística, a pandemia tróuxoa de volta a Galicia e Catuxa medrou, ou poderiamos dicir que renaceu, na súa expresión artística; unha creación musical e estética que Catuxa define como “unha fusión de ritmos tribais latinoamericanos con música en galego, nun envoltorio electrónico”. No 2024 os Premios Martín Códax danlle unha alegría ao proclamala como gañadora da categoría Músicas do Mundo e Mestizaxe. Catuxa Salom acaba de presentar Cāldo, un disco que confirma que é unha das voces máis potentes da escena electrónica do momento; e isto sen renunciar ao folk nin á súa herdanza arxentina, que se impón como misión a conexión co público para que “conecte, baile e goce o ritmo dos tambores”.