غادة عبد العال: إنه الكورتيزول يا صديقي!

زمان، لما كان التليفون الأرضي يرن بعد الساعة ١٢ بالليل، البيت كله كان بيتخض. لأن المكالمات المتأخرة ما كانتش بتيجي غالبًا عشان حد يقول لك: «تصبح على خير»، وإنما عشان خبر مش لطيف، أو مصيبة قررت تستنى نص الليل عشان تنزل على دماغ العيلة.

دلوقتي، مافيش داعي نستنى التليفون يرن. المصيبة بقت بتوصل لنا كل دقيقتين في صورة نوتيفيكيشن.

رسالة من البنك، خبر عن حرب، إيميل من الشغل عنوانه ”عاجل“، حد باعت لك «عايزك في موضوع»، جروب المدرسة بيعلن عن مشروع مطلوب تسليمه بكرة الصبح وعليه كل درجات أعمال السنة.

والمشكلة إن من الناحية البيولوجية أجسامنا، للأسف، ما تعرفش الفرق قوي بين أسد بيجري ورانا، ومدير باعت لنا: ”كلّمني أول ما تصحى“.

في الحالتين، الجسم بيشغّل نظام الطوارئ. يفرز الأدرينالين والكورتيزول، يسرّع ضربات القلب، يرفع ضغط الدم ونسبة السكر مؤقتًا، ويوجّه الطاقة للأعضاء والعضلات اللي مفروض تساعدنا نهرب أو نحارب. وده نظام عبقري جدًا.. لو فيه فعلًا أسد.

لكن المشكلة إننا ما بنهربش، وما بنحاربش، وما بنعملش حتى بلوك للمدير. بنفضل قاعدين مكاننا، والجسم في حالة استعداد لمعركة لا تبدأ ولا تنتهي.

الكورتيزول في حد ذاته مش شرير. بالعكس، ده هرمون ضروري لتنظيم الطاقة وضغط الدم والمناعة، ومستواه طبيعي إنه يعلى الصبح عشان يساعدنا نصحى، ويقل تدريجيًا بالليل عشان ننام. المشكلة تبدأ لما التوتر المزمن يبوّظ الإيقاع الطبيعي ده، ويخلي الجسم عايش طول الوقت كأنه عبد واقف على باب مسرح روماني مستني معاد المعركة.

ومع الوقت، الضغط المستمر ممكن يساهم في اضطراب النوم، وزيادة الشهية والوزن، خصوصًا حوالين البطن، ويرفع احتمالات الضغط والسكر وأمراض القلب. كمان ممكن يأثر على التركيز والذاكرة والهضم والمزاج، ويخلّي أعراض القلق والاكتئاب أسوأ، ويربك تنظيم الجهاز المناعي والالتهاب.

لكن ده لا يعني إن الكورتيزول هو أبو كل الأمراض. الأمراض المزمنة بتحصل نتيجة خلطة معقدة من الوراثة والعمر والبيئة ونمط الحياة والحالة النفسية. لكن في نفس الوقت فالتوتر واحد من المتهمين الأساسيين، اللي ممسوكين متلبسين في مسرح الجريمة.

أهالينا عاشوا ضغوط يمكن تكون أصعب من ضغوطنا: حروب، وأزمات اقتصادية، ومسؤوليات أسرية أكبر، وفرص أقل. لكن ضغوطهم كانت، في أحيان كثيرة، لها بداية ونهاية ومساحات صمت بينها. الخبر له ميعاد، والشغل له باب يتقفل، والناس لما تروح البيت تختفي فعلًا، مش تكمل معاك على واتساب لحد الفجر.

إنما إحنا عايشين في زمن الضغط المتقطع المستمر: مافيش كارثة واحدة ضخمة، لكن فيه ألف دبوس صغير بيتغرز في الجهاز العصبي من أول ما نصحى لحد ما ننام والموبايل في إيدينا.

والحل مش إننا نشتري مكمل مكتوب عليه: ”يخفض الكورتيزول“. الحل أقل إثارة وأكتر فاعلية: نوم منتظم، مشي وسط الخضرة، وقت من غير شاشة، لعب مع حيوان أليف، علاقات آمنة، وطلب مساعدة نفسية أو طبية لما الضغط يبقى أكبر من قدرتنا.

كل دي مش رفاهيات فارغة؛ دي طرق بتقول للجهاز العصبي إن الخطر انتهى، وإن مافيش أسد ورا الباب.