" صنائع المعروف | برنامج رمضان قرب يلا نقرب - الموسم الرابع🌙 | د. محمد جلال و الأستاذ محمود عطيفة

النهاردة إن شاء الله هنتكلم عن عودة الرّوح في العمل الخيري، أو العمل التّطوعي، أو صنائع المعروف، فيه ناس يا جماعة تعتبر إن صنائع المعروف أو العمل الخيري ده بيتعمل في رمضان بس، وفي بعض النّاس بيعتبروا إن العمل الخيري ده بيبقى معاها العمر كله، وفي ناس بيجعلوا العمل الخيري ده قضية عمرهم كلهم، معانا واحد من الصنف الثالث وهو واحد نحسبه يعني من النّاس اللّي جعلت من العمل الخيري قضية حياتها، هو الأستاذ محمود عطيفة  النهاردة يا جماعة إن شاء الله عندنا هدف كبير جدًا، هدفنا إنك إنت تطلع من الحلقة دي تعمل خير على طول، أو تقدر تقول وإنت في الحلقة عمّال بتتصل بالتلفون عايز تعمل خير وإيدك بتاكلك، ده إن شاء الله هدفنا في الحلقة النهاردة، إنّك إنت تعمل خير وإنك إنت تحب عمل الخير، وتدعو النّاس لعمل الخير، وإن إحنا نجاوب لك على سؤالين مهمين جدًا: السؤال الأولاني: أنا بعمل خير ليه أصلًا؟ إيه اللّي أنا هستفيده؟ السؤال الثاني المهم: أعمل خير إزاي؟ وده سؤال برضه مهم جدًا ومعظم النّاس بيسألوا فيه. 💦 عشان تعمل عمل خير محتاج تعرف شوية حاجات، الحاجة الأولانية إن عمل الخير ده حيفيدك في الدّنيا قبل الآخرة، النّبي –صلَّى الله عليه وسلم- قال: "صنائع المعروف تقي مصارع السوء،  وكل النّاس اللّي بتسوق العربيات على الطريق ومشيت في عمل خير عارفة ده، لأن كمية الحوادث الّلي ربّنا نجّاهم بها بسبب والله العظيم الحديث ده فعلًا، فعلًا بتقي مصارع السوء. النّبي صلَّى الله عليه وسلم قال: "إنّ الله في عون العبد ما دام العبد في عون أخيه،  يعني طول ما انت بتجري في حاجة النّاس وتساعدهم، ربنا بيبعث لك اللي بيبقى في حاجتك، يعني أنت ربّنا بيستعملك إنك أنت تقضي حوائج النّاس، تلاقي وأنت في مصلحة حكومية ربّنا يبعت لك اللي يخلصلك المصلحة، وأنت في لجنة الامتحان تلاقي إن ربّنا يبعث لك اللي بييسّر لك أمورك. تلاقى دايما فعلًا ربنا يبعت لك اللى بييسر لك ويعينك. الحاجة الثانية: وأنت في القبر النّبي-صلّى الله عليه وسلم- قال عن الصدقة إن هي تطفيء النّار على أهل القبور، يعني والعياذ بالله لو واحد يٌعذَّب في القبر تيجي يا جماعة الصدقة تطفي النّار دي، يعني والعياذ بالله يبقى الواحد بيُعذَّب ونفسه في أي عمل صالح ييجي، تيجي الصدقة دي تطفي النّار دي تمامًا، وحديث النّبي-صلَّى الله عليه وسلم-:إن الصدقة، أو صدقة السر، تطفئ غضب الرب، تحس إن الصدقة دي هي البرد والسلام، برد وسلام بطفي نار العذاب بيطفيء الغضب، ده حبل النجاة، الحاجة الثانية إن الفائدة بقى اللي أنت هتاخذها يوم القيامة، وده يعني مفيش أكثر من كده، أحاديث وآيات في فضل العمل التطوعي وفضل الصدقة، يوم القيامة مفيش أكثر من كده، يعني إيه إللي أنا ممكن ثاني أستفيده يعني؟ أعمل خير ليه؟ وانت شغال في الأرض أ.محمود عطيفة: احنا شغّالين في الأرض شوية، أنت طبعًا جزاك الله خيرًا. والدّنيا والقبر والآخرة ده الأساس بتاعنا اللي احنا بنسعى له يعني، أنت لمّا تيجي بقى تعيش في الدّنيا في وسط النّاس، بتبدأ إن أنت تتكلم مثلًا في نقطة تفريج الكرب، وفي تفريج الهم مثلًا، أنت فكرة إنك انت تشوف عيون النّاس بفرحتها لمّا أنت بتقدم لهم المساعدة بتاعتك مثلًا أو إن أنت بتعمل عمل خير بإيدك بتنجدهم من حاجة أو إن أنت بتقدم لهم العون في حاجة، و بتقضي لهم حوائجهم كمية الفرحة اللي بتطلع من عينيهم وقلبهم يبقى مستريح لا توصف، أيًّا كان بقى، الكلام ده مش هاعرف أحكيه يعني في كلام لأن مش حيبقى مٌعبِّر زي ما أنت بتشوفه بعينيك. 💦هو كان فيه حديث بيتكلم عن الحج النبي-صلَّى الله عليه وسلم- كان بيقول إيه: حجّوا قبل أن لا يكون حج يعني إنك أنت استغل فرصة إنك أنت تحج، لأن هيجي زمان مفهوش حج، فالحديث ده بقى معاه حديث النبي-صلَّى الله عليه وسلم- الرجل يخرج بالصدقة في آخر الزمان، لمّا بقى يكثر المال، يكثر المال لدرجة إن الرجل يخرج بالمال عشان يتصدق به فلا يجد من يتصدق عليه، كنّا مرة بنحاول نعمل زي سيدنا أبو بكر إن إحنا نصوم ونطعم مسكين ونتبع جنازة ونزور مريض وكده، وخلصنا كل حاجة ولسه لنا إيه؟ إطعام المسكين، فمعدش على المغرب غير وقت قليل واحنا جبنا الوجبة وعمالين نلف في الشوارع، ندور على أي مسكين، ونقعد ندور ومش عارف إيه ومفيش وقت بقى، فأنت عمال تلف مثلًا في الشوارع ومش عارف إيه والكلام ده، ففي خلال الوقت ده ما كناش لاقيين حد بسهولة، فقعدنا فعلًا نفتكر الحديث ده، إن شوف إنت فعلًا معاك الحاجة وبتدور على حد تديها له ومش لاقي، طبعًا هما كثير بس إنت في الوقت ده إيه؟ ربّنا –سبحانه وتعالى- باعث لك رسالة معينة.